پرېږده چې لوظونه د دروغو دې رښتیا کړم

پرېږده چې لوظونه د دروغو دې رښتیا کړم

ته راته سبا سبا کوه زه به بېګا کړم

توان لرمه دا چې د ماضي نه خراج واخلم

زه به پخوانی شمه ستا مینه به پخلا کړم

برند که حوادث دي د وختونو په ککو کې

زه به حوصله هم پښتنه ورته پیدا کړم

لا یې د سپین مخ خالونه شمېرم، اوزګار نه یم

پرېږده الواته به د سپوږمۍ په لورې بیا کړم

ستا په اننګو کې د حمزه د وینو سره دي

ته شوې د پښتو غزله ځوان، زه دې بابا کړم