د دنيا ياران په خوی دي د دنيا

د دنيا ياران په خوی دي د دنيا

بې وفا لکه يې مخ هسې يې شا

که د دين د پاره تا سره ياري کا

له هغو غواړه که غواړې څه وفا

د دنيا ښادۍ غمونه سره گډ دي

په خندا خندا دې ژر کا په ژړا

چې فتنې ترې پيدا کيږي واړه نفس دی

نفساني ياران به نه وي بې بلا

اوليا د اوليا سره بد نه وي

دا په دا چې يې د نفس نشته هوا

په دنيا د بادشاهانو سره ضد دی

امرا سره دښمن وي امرا

يا په نه يارۍ کې سود دی که پوهېږې

پا په نه ويل کې سود دی د دانا

بيا هاله د بل جفا و ته نظر کړه

که ته نه وينې په ځان کې هيڅ جفا

لکه تا سره څوک څه کاندي خوشاله!

ته هم هسې زيست روزگار کړه له هرچا