دا کوم طرف ته اوړي زما سترگې لوري لوري

دا کوم طرف ته اوړي زما سترگې لوري لوري

اشنا چې ليدی نه شي چرته گوري ، څه ته گوري

نمر مخی يار چې لاړ زما د خيال له دنيا ووت

نور واړه مهرويان و راته برېښې لکه ستوري

نسبت د مينې ورک شو چې خپل ځان ته په کاته شوم

غايبه آيينه شي چې څوک خپل عکس ته گوري

بيا سترگې زما ډکې ډکې کېږي پسرلی شو

وريځې ډکې ډکې کېږي پسرلی شو

اشنا چې راته مخ کړو، کډې واخيستې غمونو

يا نمر شو راڅرگند په پټېدو شو واړه ستوري

اشنا خمار د سترگو دې چې څوک توبه گار کړی

ملگری د زاهد شو د شرابو نه ځان ژغوري

دا يخ يخ اسوېلي به حمزه! ته کوې تر کومه

باران د بېلتانه به تل ترتله په تا اوري