د روژې د نيت فصل

درته وايم د روژې له حقيقته

څو روژې دي بيا يې فرض دي هومره نيته

روژه فرض ده يوه مياشت پوره تمامه

چې درله شي تر آغازه، تر انجامه

له جمله واړه طعامه په ستنه شه

و جماع و دخول ته نژدې مه شه

که دې نيت د روژې نه وکړ مسلمه

د روژې قضا په تا شوله لازمه

که په شپه د روژې نيت وکړې بهتر دی

او که نه لاتر زواله معتبر دی

چې دې نيت د روژې وکړو مسلمانه

د روژې د درلو چار کړم در عيانه

مچ و ماشی که دې کار ته شه تر ستوني

د روژې نقصان دې نشته هم پکوني

که دې و کشې په څه وينې له وجوده

په دا هم د تا روژه نه ده نابوده

که دې مالگه، سر که چا کړه په دهان کې

ويې نه خورې روژه نه ده په نقصان کې

که جماع کړې که خواړه که اوبه نوش کړې

عيب نشته که سهوه فراموش کړې

که په قصد دې دخول وکړ يا خوراک خورې

کفارت په تا لازم شه دا بېباک خورې

که په اوسپنه په کاڼي يا په لوټه

په خوراک سره روژه کړې کټه کوټه

کفارت درباندې نشته په دا پوه شه

خو قصا در باندې اوړي په اندوه شه

که په قصد دې روژه ماته په خواړه کړه

ياجماع دې د عورتې سره وکړه

په درې څيزه کفارت د روژې کېږي

مؤمنان به په هر درېواړه پوهېږي

يا ماړه کړه شپېته وږي ای هوښياره

يا آزاد کړه يو بنده دخدای د پاره

يا دوه مياشتې روژه ولره ای جانه!

په دا درې توکي ځان خلاص کړه له تاوانه

دا کتاب مې ترجمه په افغاني کړ

افغانانو ته مې کار په آساني کړ

که خبر په ډېر دانش په دانايۍ يم

په دا کار کې هم پيرو د "سنايي" يم

که غلط په کې واقع وي ويې گوره

په کرم يې آراسته کړه د ما وروره

چې يې لولي يا يې ياد کا يا يې کسبېنه

په خوشال دې د دعا مهر لرينه

هغه کال چې مې مقال ددې کتاب کړ

د هجرت سن مې زر شپږ شپېته حساب کړ