د هستۍ بېړۍ د پاره گودر ښه دی

د هستۍ بېړۍ د پاره گودر ښه دی

ولې سيند ددې په هورته ژور ښه دی

د يار سترگې بې قرارې هسې وايي

چې هر څيز ته الوتونکی نظر ښه دی

چې ستا ياد مې له زړه ووتو مضطر شوم

لېونی له کوره چا وې بهر ښه دی

لا موسکۍ زما ځواني په انتظار ده

ستا زما نه اوړېدلی نظر ښه دی

مينه بې له رسوايۍ کله پخېږي

تعلق چې لا کچه وي خطر ښه دی

په اول کې خبر، بيا بې خبري ده

دا د مينې بې خبر ته خبر ښه دی

حمزه! ژوند د جهان واړه اضطراب دی

ټوله مينه په شپه مه کړه سحر ښه دی