دولسم فصل - په بيان د تعريف د جره کې

جره څه دی؟ د باز نر دی که پوهېږي

په تعليم کې تر باز زر دی که پوهېږې

تر پينځه کريزه باز الواته ښه کا

چې جره ښه کريزه شي پرش نه کا

په کريز کې قابوچي شي کوته پر شي

تر کريزه الواته دده هنر شي

لوی کټه جره د باز په دود کريز کا

په پرش کې دور دوی لکه باز تېز کا

سينه ور، لنډه لکۍ جوره په کار دي

کټه سري، کړاغې سترگې د لوی ښکار دي

غاړه ور، کټه مښوکه، وړې سترگې

هم هغه جره وهي د غرونو چرگې

يا ډېر کټه و باز ته ځوړ جره هغه دي

يا ښه جوړ هر گوره وړ جره هغه دي

لکه رنگ ترکيب د باز جره هغه دي

لکه باز پهن دراز جره هغه دي

که د باز مينه په ښه جوره ماتېږي

عراقي چېرې ترکي سره سمېږي

لکه باز پرونه ساز کا خوش روي کا

جره کله هغه هسې دور دوي کا

چې د باز علاج دارو هسې دده کا

طبيعت يې ډېر نازک دی لا يې ښه کا

چېرې نه وي چې يې ډېر په ښکار کې خوار کړې

حلاوت يې هم په دا چې ته پرې ښکار کړې

مرغابۍ درې څلور زر کې دا هومره

د تارو تمځري څه وايم چې څومره