عشق مې بنا کړی جوړوي د بقا رنگ

عشق مې بنا کړی جوړوي د بقا رنگ

وگوره په سترگو کې زما د فنا رنگ

ای د مينې رنگه په دې رنگ مې خبردار کړه

ستا رنگ يې چې رنگ کړی، دی په تا کې د چا رنگ

رنگ د بې رنگۍ نه، بې رنگي له رنگه جوړه

رنگ چې بې رنگه بې رنگي شي صفا رنگ

واړه رياضت و د زاهد د رنگ د پاره

تېر چې شو له رنگه شوی هلته خطاب رنگ

زه لکه بلبل په نوا سر کړم رنگ د گلو

ورکه که هستي کړم خو به وي بېنوا رنگ

رنگ دی چې يې سر کړه طالبان په بلو بلو

ځان وته لار ښايي د دلبر نه جدا رنگ

رنگ لره بقا ده خو بقا يې هم فنا ده

يو ځای چې فنا شي د بقا شي فنا رنگ

دا هم يو تلاش دی چې حمزه يې تلاش نه کا

گوري چې کوم رنگ ته هغه وي د اشنا رنگ