نظم
فصل - د نماز جنازې د ثواب
خوشحال خان خټکد ښه خدای په قول ای ياره
نمونځ واجب په مړه وشماره
څوک چې نماز جنازه کا
بايد دادی دا دې زده کا
د قبلې په لور دې کېږدي
مرده درې صف د پلېږي
برابر په سينه زويه
د امام درېدل بويه
چې صغير وي که کبير وي
جنازه په چار تکبير وي
تکبيرونه چې ادا کا
په آخر دې سلام بيا کا
په اول تکبير لاسونه
وروړه بويه ترغوږونه
چې اول تکبير ووايې
بيا سبحان هم ووايې
تحيات پسې ولوله
په دويم تکبير دا لوله (اَللهم صَل عَلی مُحمدِ تا حَميد مجيد)
په دويم تکبير دا وايه (اللهم اغفر لحينا و ميتنا و شاهدنا و غائبنا و صغيرنا و کبيرنا و ذکر نا وانثانا اللهم من آخييته منا فاحييه علی الاسلام
چې څلور تکبيره وشي
ستا سلام دې بيا هاله شي
په اول تکبير لاس بويه
چې ته هسک کړې زما زويه
يا امير يا قاضي بويه
چې امام شي راضي بويه
يا امام د جمعې ياره
يا خطيب پنځم وشماره
که دا هيڅوک حاضر نه وي
هر سړی چې پر لوست ښه وي
يا يې خوېش يا اقربا وي
يا چې حکم پرې دچا وي
چې امام جنازه کاندې
يا چې لولي په ده باندې
مقتدي چې ورپسې وي
په لوستن دې هم هسې وي
که سړيه شمار اندک وي
هم په درې صفه دې لک وي
دا حديث د پاک رسول دی
چې هغه مرده قبول دی
چې دده جنازه کېږي
پرې درې صفه ودرېږي
که حاضر پرې ډېر عالم وي
په مرده د خدای کرم وي
جنازه چې شي، خبرې
څوک دې نه کا نژدې لري
د نمانځه چې تکبير چار وي
په څلور رکعته شمار وي
چې داخل په هر تکبير شي
له امامه دې خبر شي
چې امام سلام وکاندې
تر وروستې ماموم د وړاندې
دی دې پاتې تکبير درست کا
د سلام دې هاله لوست کا
که مرده خلق په گور کا
بې نمانځه نه يې نسکور کا
پس له درې ورځو که کاندې
نمونځ پرې کېږي وروستو وړاندې
چې تر دې وروځو نه تېر شي
نمونځ پرې نه کېږي نور ډېر شي
که هلک پرېوځي نه موره
که مرده وي ويې گوره
په جنين باندې مونځ نه شي
بې مانځه دې ښخاوه وشي
که ډېر مړه سره انبار وي
مونځ په واړو يو گذار وي
که ډېر نر ښځې گډوډ وي
هلک هم ورسره گډ وي
دمردارنو صف اول وي
ور پسې د ښځو بيل وي
بيا دې وړوکی پسې کېږدي
جنازه دې يې ولېږدي
مونځ په واړو يو گذار وي
نه په هر مرده بار بار وي
که ولي يې حاضر نه وي
دوباره پرې مونځ هاله وي
جنازه چې په لار درومي
چې يې ښه سړی بيا مومي
که نماز ورباندې کاندې
صد رحمت په هغه باندې