گله! ته چې په بلبلو هومره خيال کړې

گله! ته چې په بلبلو هومره خيال کړې

دا خيالونه همگي په خپل جمال کړې

دا جمال به دې جاويد په جهان نه وي

ښه خو دا گڼه چې شکر په دا حال کړې

د انصاف په سترگو ښه ننداره وکړه

جهان څو کښلې څېرې هسې پايمال کړې

ډېرې خونې د هجران په لمبو وسوې

ما ليدې چې تجلی يې په وصال کړې

د بهار گلزاره ښه يې، خوی دې بد دی

چې راتلنه يو څو ورځې په درست کال کړې

تر قدرت به دې ځارېږم ذوالجلاله!

رنگا رنگ گلونه ښه هسې نهال کړې

د بلبل د پاره تل وای په چمن کې

د پسرلي گله! تله ولې دم در حال کړې

که دې سترگې د عرفان شته مبارک شه

د گلزار په ننداره چې استقلال کړې

گل ته هسې رنگ و بوی ورکړی چا دی

د لاله د گل چا هسې پاڼې لال کړې

چې گلونه همېشه د گلشن گوري

لکه خضر هومره عمر د خوشال کړې