گوره! د يار مخ ته بيا لېمه پرې ويلوه

گوره! د يار مخ ته بيا لېمه پرې ويلوه

زړونه د بد رنگو رقيبانو ويلوه

دا دی هغه مخ چې په هجران کې پسې ته مرې

اوس يې په وصال کې دواړه لوريه کښلوه

لويه پېشکشي ده په وصال کې درته وايم

دُر يې په لمن کې ورته گوره تلوه

زه د بېلتانه په حال خبر نه وم، خبر شوم

خدای له خپله ياره نه هيڅ يار مه بېلوه

تندر د رقيب په کور پرېوځي، قهقه خانده

سپينه آيينه د شگو گل خپل يار ته ځلوه

يو ځله چې زړه د چا په مهر مينه بند کړې

شرط د يارۍ دا دی زړه بل ځای مه نښلوه

کډې دي د زړونو ستا د مخ په لور روانې

واړه ملک بوستان دی، په هر ځای يې ملوه

درسته دې له خپلو نمريو ووېستم خوشاله!

يو د غاړې هار مې دگلونو مه شلوه