حق د فرزند په پلار

پرې خوښېږه که صالح وي

خدای ښه کړه که طالع وي

له فرزنده حيا غواړه

که حيا لري پرې وياړه

که په سترگو کې يې نو وي

تل به دی سخن شنو وي

دولس حقه د فرزند دي

په خپل پلار باندې څرگند دي

اول ښه پاکيزه مځکه

چې مايه يې نه ش ي ورکه

بل چې ډکه شي عورته

ځان دې نيسي له صحبته

چې فرزند يې پاک پيدا شي

نه ککړ بې باک پيدا شي

بل چې نوم باندې کېږدينه

نوم دې ښه ورباندې ږدينه

بل حلاله لقمه بويه

تر هر څه ده دا چار لويه

بل ختنه دې يې زر کاندي

لازمي ده دا پرې باندې

بل قران چې ولولينه

مسايل دې زده کوينه

بل حلال کسب دې زده کا

چې خپل قوت لره هغه کا

بل دې غشی زده کوينه

چې پرې ښه وپوهېږينه

بل د آس سواري لازم ده

آب بازي ور سره هم ده

نور دې زده کا ادبونه

ناست ولاړ په مجلسونه

خط دې هم زده کا ای جانه

چې ژوندون کا بې ارمانه

نور حصه له ماله ور کړه

په دولت يې بهره ورکړه

بل له ښه پاکيزه کوره

ورته ښه ناوې وگوره

دا حقونه يې په ځای کړه

ورته نور پناهي خدای کړه