حفاظت حمل

بار چې واخلي ارتينه

د فرزند يا ښځينه

نه دې دروند پېټی اخلي

نه دې زور کا نه دې ځغلي

نه دې مار په سترگو گوري

نه دې لوړ په ژور ښوري

نه دې پاس په بام وخېژي

نه دې قهرړ غوسه کېږي

نه دې درومي و حمام ته

نه دې زړه کا، تريو طعام ته

چې ترخه او باد انگېز وي

له هغو دې يې پرهېز وي

دارچيني دې هم ډېر نه خوري

هر طعام دې هم سېر نه خوري

په جماع کې دې ځان ژغوري

چې پرې زور شي نه دې ښوري

رگ وهل که حجامت دی

دا هم دې لره زحمت دی

که لطيفه غذا خورينه

خوږ هر څيز فايده لرينه

که فرزند ځنې جدا شي

هم دا دې يې دوا شي

معجونات دې گرم خورينه

له هوا دې ځان ساتينه

زعفران دې له عسل خوري

هم دې ماء د سپين بصل خوري

په خپل وخت چې لنگه شينه

په اوبو کې دې کښېنينه

اوبه ښې د بنفشې وي

مرز نجوش د پودينې وي

که ملخوزی که باديان دي

دا همه راحت دځان دي

که اوبه کا د دوی گرمې

کښېني رنځ کا ترمې ترمې

موم روغن دې په ځان مږي

چرگ، حلوا، دې ځانته کوږي

که دا هېر نه کا له فکره

ځان به بيا که له بکره

وصيت د مصطفی دی

چې راوي يې مرتضی دی

چې دې ناوې په کور راشي

نصيحت دې ورته دا شي

چې اول هفته عزيزه

دا دې نه خوري پينځه څيزه

يو تريو څيز بله سرکه ده

يوگشنيز بل گندنه ده

پنځم څيز ډوډۍ سپوره

چې رحم سوړ کا ای وروره

له فرزنده شي مايوسه

حمل نه اخلي عروسه

که په کور کې زوړ بوريا دی

ښه تر شنډې ښه زېبا دی

په کار نه ده ښځه شنډه

که د وازدو لري ټنډه

دجماع په کار کې جانه

لکه نوشده ښځه ځوانه

د زړې صحبت زحمت دی

د مار وښ ددې صحبت دی

چې تر څوارلسو تېرېږي

ښځه شلو ته رسېږي

په دا منځ لکه نبات ده

نبات څه آب حيات ده

چې تر دېرشو کالو ورشي

نبات نه دي نور شکر شي

تر څلوېښتو چې تېرېږي

نور دگوړې په نرخ کېږي

چې بي بي پنجاه ساله شي

نور دې کور پرې حواله شي

خصمانه دې د اولاد کا

ننداره دې د داماد کا

هسې رنگ دې سپين سرتوب کا

چې نور ورک گنده آشوب کا

چې سپين سر پرېوځي و تاته

ته مولۍ کړې پکې ماته

نه يې خوند نه يې مزه وي

يو څېر يې موصله وي

په جماع عقل زياتېږي

حرارت د تن پرې کېږي