خبر ور څخه نه وم په څه خيال راغله پيري

خبر ور څخه نه وم په څه خيال راغله پيري

په لوړو، په ژورو دم در حال راغله پيري

د سترگو په جوهرو مې په سې کې راښکاره شوه

په مښکو، په گوهرو مې په کال راغله پيري

تر مرگ څه کمه نه ده ما يې ښه ننداره وکړه

په زور او په قوت په ملک و مال راغله پيري

په زړه چې را په ياد شي د ځوانيې تلاشونه

د واړو تلاشونو پايمال راغله پيري

اقبال په مثال گل دی، تن په مثل لکه بوټی

په تن باندې چې راغله، په اقبال راغله پيري

د مخ ده، که د تن ده، که د لاسو، که د پښو ده

د کل واړو خوبيو په زوال راغله پيري

وردرومه آيينې په يوه کونج د مځکې پرېوځه

د کښليو په جمال، په خط و خال راغله پيري

چې جونو وته گوري خجالت ورځي په خپله

په عشق و محبت کې انفعال راغله پيري

نه ښکار شته نه گوزار شته اوس دې جوړ سلامت گرځي

د تورو د غره بزونه په خوشال راغله پيري