ښې ښې شپې شي، ځينې پېښې

ښې ښې شپې شي، ځينې پېښې

غېږ په غېږ شې شفت ځبېښې

څښي، څښي، څښي، ښيښي تشېږي

نن به شي بخښنې ښې ښې

چين ، چين څڼې ځي په شين

بتې زشتې فتنې پېښې

شي په چين تشې پوښتنې

چين چين څټې پښتنې ښې

شين ځي په شين شين

نخښې نخښې ختې پښې ښې

ښاپېرک که په هوا ځي په تورتم کې

په راتله د رڼا ورځې دی په غم کې

لکه چتی درسته ورځ درومي په پورته

هغه هومره باز شاهين درومي په دم کې

دچندڼ او ښونه فرق سره هيڅ نه و

که چندڼ تر ښو نه ښه نه وای په شم کې

چا له ډنډه دُر گوهر نه دي وکښلي

قيمتي لؤ لو لالا غواړه په يم کې

که گيدړ په خم کې رنگ شو په دا څه شي

خو بيا هم هغه گيدړ دی په شيم کې

زاهدان شېخان مې وليدل نامرد دي

مرد عالم رباني دی په عالم کې

څرخ مې ځکه په سر لوني گلونه

چې يې خاورې غوندې پروت يم په حرم کې

که هاتي د بادشاه ومري غم يې نشته

چواړي د سپي په مرگ دی پهآلم کې

عشقه! واړه ستا د غمونو خرخشې دي

چې په سوات راسره گرځي هم په سم کې

گوتې ومنډه په غوږ کې ترې تېرېږه

ذاکر زر ذکرونه کا، زړه په درم کې

که خوښيې دوصال ور سره نه وي

عاشقان کله خوښېږي په ارم کې

هغه چر دې واړه گوتو ته نظر کا

چې يې وي سترگې نيولې په صنم کې

افرين دې په ويلو شه خوشاله!

چې د تورو رژول کړې په قلم کې