ښکليه په ديدن کې دې گرانۍ مه جوړوه

ښکليه په ديدن کې دې گرانۍ مه جوړوه

پام کوه د وينو ارزانۍ مه جوړوه

تېر شو وخت چې تا مې کړې له صبر سره لوبې

بس کړه راته سترگې پخوانۍ مه جوړوه

يو ديدن دې کم و چې تصوير دې د حيرت کړم

نورې پرې د پاسه عريانۍ مه جوړوه

گرانې به ورپېښې دا تکل د خوشحالۍ کړي

پرېږده غم، په غم کې اسانۍ مه جوړوه

ما خو وې چې غم د زړه د کور کوه چې وران دی

چا درته ويل چې ودانۍ مه جوړوه

ستا د هوسو سترگو چې زه ښکار يمه کافي يم

نورې نو وحشت وته ځوانۍ مه جوړوه

پرېږده پښتنې جذبه مې ای د مينې جذبه

پام کوه په دوی خپلې خانۍ مه جوړوه

هسې نه نصاب دې دښکلا شي له نظره

هره ورځ اختر د قربانۍ مه جوړوه

خوښ په دې حمزه دی چې انکار له وفا وکې

خوشې بهانې خو افغانۍ مه جوړوه