لکه زه يم پيدا شوی په دا مينه

لکه زه يم پيدا شوی په دا مينه

د نور چا به هسې نه وي پيدا مينه

د قصاب چاړه په غوښو هسې نه کا

لکه کا زما په زړه د اشنا مينه

درست عالم راباندې غاو که زه حيران يم

چې له زړه په څو لرې کړم ستا مينه

په يوه تن کې دا دواړه توکه نه وي

هم د حسن استغنا هم د چا مينه

نه به بوی د مښکو پټ شي په نافه کې

نه به پاتې شي مخفي د شيدا مينه

ما په سحر، په جادو تقصير ونه کړ

د نا ترس خاطر يې نه شي په چا مينه

په ژړا به مې دوه سترگې وچې نه کړې

که په ما شوای د خپل يار په ژړا مينه

لور په لور يې په همه عالم رسوا کړ

کشکې نه وای د خوشال دا رسوا مينه