لېونی خو يو خوشال دی

نشته هيڅ، يو تش جنجال دی په دا منځ کې

خالي پحث او قيل و قال دی په دا منځ کې

چې په مکر د ويښته د پاسه درومي

شل په دواړه پښې يو ذال دی په دا منځ کې

د يزيد د شمر نه، نه د حجاج دی

دور دور د دجال دی په دا منځ کې

نه شراب شته، نه گلاب شته، ښيښه ډکه

قاروره که څه تمثال دی په دا منځ کې

دښمنۍ له واړه سر وهي له ډاگه

د اشتيې کارمحال دی په دا منځ کې

گوره څو کلې به پرېوځي په دواړ لوريه

زيد و عمر اختلال دی په دا منځ کې

سر رشته دچارې هيڅ نه ده معلومه

خو هم هسې غول او غال دی په دا منځ کې

يو څلور پينځه خووشول څو به وشي

يويو کوټه په هر کال دی په دا منځ کې

چې يې کاندي چې يې وينم چې يې اورم

د هر چا مکرټيټال دی په دا منځ کې

دروغجن چې هومره نه دي په دنيا کې

د رښتنيو څه مجال دی په دا منځ کې

اواره نوره گټنه تلف مه شه

چې گټلی ملک ومال دی په دا منځ کې

چې يې هر چېرته څکوي ورپسې درومي

يو عجيب شتر مثال دی په دا منځ کې

پښتانه، مغول، هندکي واړه هوښيار دي

لېونی خو يو خوشال دی په دا منځ کې

خر يې پاسه د سړيو په سر گرځي

شل په دواړه پښې دجال دی په دا منځ کې

د ټټوانو بيه ښه کا تر اسولو

ناديده گنده دلال دی په دا منځ کې

يو په سله، سل په هيڅ کا يو سړی وي

کومه گرانه، کوم اشکال دی په دا منځ کې

چې په چا دنصيحت وينا لگېږي

دا يوخوب دی يو خيال دی په دا منځ کې