لوړې ژورې مې په سترگو کې دي

لوړې ژورې مې په سترگو کې دي

کندې کپرې مې په سترگو کې دي

سترگې مې سترگو ته راپورته خو کړه

د زړه خبرې مې په سترگو کې دي

لوړې د حسن دې روزي شه اشنا

د عشق ژوري مې په سترگو کې دي

دا د ځوانۍ څه روستنۍ سلگۍ

راغلې سندرې مې په سترگو کې دي

ستا د نظر هرې ادا ته رسي

داسې وزرې مې په سترگو کې دي

عقله فطرت دې د نگهت راکړی

گنې کمرې مې په سترگو کې دي

پاس چې اغيار راته کتلی نه شي

جوړې بمبرې مې په سترگو کې دي

وايم په زړه کې ورنژدې به شمه

څه لرې لرې مې په سترگو کې دي

حمزه په طمع ټيټې نه شوې چرې

چې سترې سترې مې په سترگو کې دي