ماته هغه ښکلي، څه که بد وايي که ښه وايي

ماته هغه ښکلي، څه که بد وايي که ښه وايي

زه په دې پوهېږم چې په خوله او که په زړه وايي

منع د شرابو خدای زده نوي که زاړه وايي

ورشه د واعظ نه خو تپوس وکړه چې څه وايي

ښکليه چې ماته کړي منتخب په کايناتو کې!

خلک چې مېن ته وايي ړوند، ووايه ښه وايي؟

سره يې اننگي شي چې په ما يې نظر پرېوځي

ډېر څه راته وايي که هېڅ راته ونه وايي

گوره چې يې ښکته په گستاخ نظر د چا نه کړې

ستا برندو اوږدو بڼو ته خلک پښتانه وايي

مينه د کږو سمو د قيد نه خو ازاده ده

ماته همه ښه ښکاري که سم او که کاږه وايي

خولې ته وار خطا خبرې راغلې دديدن په وخت

يار په تبسم خکلو ته ووې چې دا څه وايي

ستا دخوږو عشقه ماته هغه وخت احساس وشي

کله چې اشنا په خوږه خوله راته تراخه وايي

خير دي ارمانونه مې حمزه د زړگي وينو ته

جار کړي پښتانه ورځنې څۀ چې مېلمانه وايي