نن دې دور د خوبيه دی دماغ کړه

نن دې دور د خوبيه دی دماغ کړه

يا د يار په زړه مرهم ږده يا يې داغ کړه

په خندا خندا راځه! غاړه غړۍ شه!

د خپل يار خاطر له غمه نه فراغ کړه

ستا د زلفو په تور تم کې مې زړه ورک شو

چې يې بيا موم، ښکاره د مخ څراغ کړه

دمخ خال دې تور کارگه دی زما زړه وړي

د بازونو، د شاهينو ښکار په زاغ کړه

د خلوت په مخ کې ناست زاهدان ښه دي

ساقي! زه چې زاهد نه يم گشت د باغ کړه

ساقي! لور په لور گلزار دی چې ليده شي

له توبې نه کړه توبه په لاس اياغ کړه

گوره! کوم لوري ته لاړ دی مونده نه شي

دخوشال د زړه پيدا چېرته سراغ کړه