نولسم فصل - په بيان د دارو کولو د باز په سبب د خلط په کرېز کې

که ضرور شي چې دارو ور لره بويه

دا يو څو دارو دي نفع لري لويه

که دخلط په سبب روغ نه وي بيمار وي

بيمار باز هم پرونه ونيسي آزار وي

اول ورکړه په اوبو نمجنې غوښې

يو څو ورځې ښې ښې غوښې خوښې خوښې

دا څو ورځې يې آرام په دستکشۍ کړه

د علت دارو يې هله په خوشۍ کړه

قند بوره دا دواړه توکه ښه ميده کړه

دا د غوا د شدو پيو بيا سره کړه

په پخه کې يې د باز تر ستوني تېر کړه

چې يو څو پيخاله وکا اوبه وېر کړه

د باز خلط به هم په دا علا ج بېرون شي

پاک اوصاف به يې له خلطه اندرون شي

په کرېز کې که بيمار شي هم دا زده کړه

هم دا هومره تر دا زيات دارو نور مه کړه

که بدخوی يا تريناک با يد کشاد وي

د هغه دي دا دارو کا که استاد وي

د غوايه غدود نژدې و ذبح گاه ته

يا د مږه غدود نژدې و ذبح گاه ته

غدود ښه په خپلو گوتو کې ومروړه

چې زرداب ورځنې لاړ شي چار ده جوړه

چې ښه وچ شي دوه غدوده څلور ورځې

ورکړه باز ته په طعمه کې بځې بځې

وچې غوښې د ارنب واخله ميده کړه

بيا يې ته د مږک ښو غوښو سره کړه

د بنبرو بچگان په ټنکي کې

جوشيده کړه ښه د غواو په غوړي کې

د طعمې سره که باز هغه غوړي خوري

دا غوړي د باز پرونه لوی نري خوري

سپين چمجي د ولې هم ښه دي تور غاړي

سازونه د بنبرو غوندې غواړي

خوږه وله هم که وچه په سايه شي

له طمعې يې ميده کړې خوري فايده شي

شلانډه هم که په غوړيو کې وريته کړې

په طمعه هغه غوړي گډ په طعمه کړې

په کرېز کې ښه مرغۍ د ښاپېرک دي

که مرغي د توتکۍ هم بهترک دي

پرورده په خواږه تېل د شکاڼه غوښې

په کرېز کې ډېرې باز لره دي خوښې

ښه خو دا چې خبرار په علاج شې

علاجونه کړه هاله که ته محتاج شې

گڼه کار په طبيعت ښه دی هوښياره

د دارو چار همېشه ده ناپکاره

پاکيزه طعمې چې باز دهر زنده خوري

زه ضامن که جانور کريز گنده خوري