ولې راته وایې چې لږ وار کوه وار څه معنی

کار د مینې کار دی له دې کار نه انکار څه معنی

لیچې په لاس راکړه چې ولول څڼې خورې وي پرې

شرنګ دبنګړو خوند کوي  تش تار دستار څه معنی

ووایه دژوند دفلسفې شاګرده ووایه

سر په اوږو څه معنی او سر وي په دار څه معنی

غاړه کې مې لاس یوسه چې حس لري او روح لري

مړې مړې مر غلرې وړې پيلې په تار څه معنی

خلک پکې خدای لټوي  ته ماشوم خبر هم نا

پوی به شې او لوی به شې چې سترګې دیار څه معنی

داغریب سړی ګورئ  له غرونو پرون راغی ،نن

دومره جګ برجونه دسندرو دښار څه معنی

ښايي چې له دې ښاغلي لویه ښکلا ورکه ده

دومره دښکلا په لټون  سترګې په لار څه معنی

لاس دښکاري څه وایي ؟ او زړه دغرڅې حه وایي

غواړمه یوه معنی لا لیه چې ښکار څه معنی

چوپ شمه که ووایم چې دنګه یاره تا ښیم

خلک راته وايي چې « کاروانه » چنار څه معنی