اوولسم فصل - په بيان د راېستلو د باز له کريزه

په دا ملک کې چې زما وطن مسکن دی

درته وايم د ښکار وخت چې معين دی

باز اخت شي له کرېزه په ميزان کې

ښه شي ښکار د باز شاهين په دا آوان کې

په تحويل د سنبلې راشي بټېرې

مرغابۍ او زاڼې هم شي را برڅېرې

ځاړې هم په ميزان راشي که يې وينې

په اول د لړم راشي قازې سپينې

که راتلل د مرغابيو په خوشه دي

ښې د ښکار لايقې عين په لينده دي

پسرلي کې ابتدا په دلو راشي

ښې يې نيسي په دا وخت چرې سونا شي

د هيليو ښکار مونده شي تر نوروزه

تر حمل يې هورته نه وي نوره روزه

ترغوايه پورې د زاڼو ښکار مونده شي

د بټېرو ښکار په دا موسم کې ښه شي

تور تارو، زرکې ، سيسۍ، په حوت د ښو شي

په دا وخت دده نيول په کرشنو شي

د تمځري ښکار تر تلې تر حمله

کېږي ښه د مينې چار يې ده اوله

په کرېز کې باز تازه شي په جوزا کې

نه شي نور دمرغو ښکار په دا هوا کې