په خوني هاتي سوره شوه مى پرسته

په خوني هاتي سوره شوه مى پرسته

زه هم مست ، هاتي هم مست دى ، داهم مسته

بله نشته ، يا به نيست شي ، يا به هسته

خداى د درې واړو مستانو سره سر كړ

نندارو لره يې راشئ نندارچيو

يوه لويه هنگامه شوله پيوسته

چې يې ستا زلفينې كيوتې په لاس كې

لاس يې پرېوزه،كه يې دى پرېږدي له دسته

يار د ما څخه په كور دننه ناست و

زه بي روحه گرځېدم د ده په مرسته

نه ياري ، نه اشنايي ، واړه لباس دى

چې خبر شوم د وگړي له بربسته

ما په وږيو سترگو ډېر ياران خوړلي

په ځيرځير دې مخ ته نه گورم له كسته

چې د سلو كالو زهد سود د ثواب و

مغبچه مې په زمان يووړ له دسته

د خوشحال په ځان د ډېرو غشي لك دي

خو هم ده زده چې دى مري د چا له دسته