په دا باغ کې به دې پاڼې نه وي گله

په دا باغ کې به دې پاڼې نه وي گله!

که خبر شې د خزان له تطاوله

دا څو ورځې غنيمت گڼه په باغ کې

چې په تا باندې سينه وهي بلبله

مرتبه د هغه باغ څه پانو نه وي

چېخالي وي د بلبلو له غلغله

و هغې ښيښې ته نه غړېږي سترگې

د ساقي څخه چې تشه شي له مله

په دا پله باندې د خلقو گذر گوره

څوک پرېوځي، ځنې پورې وځي تر پله

په درست عمر به يې نه وځي له يادو

چې ليدلې وي تارو دباز منگوله

مقدر به په هيڅ رنگ مبدل نه شي

که په ځان باندې تل لولې څلور قله

عاشقان چې عاشقي کا، غم به نه کا

د رقيب او د غماز او له چغله

څه کړم لاس و دست مې نشته قلندر يم

گڼه ما به دنيا و نازله کله

په پالنگ به خوب په څو کاندي بې غمه

چې خبر وي د فلک له تزلزله

هسې يار لرم، ښايست يې تر دا قياس کړه

چې دمښکو بوی يې هيڅ دی له کا کله

د دلبرو په ماڼې کې هم مزه شته

بېچاره خوشال يې مري له تغافله