په خوله کلمه لولي، نمونځ روژه کاندي کافر شته

په خوله کلمه لولي، نمونځ روژه کاندي کافر شته

دعوې کا د شېخيه ، تر شيطانه لا بتر شته

منطق، معاني لولي، درس، فتوی قاضي گري کا

اکثر په دا فرقو کې که يې گورې کوني خر شته

له کوره لوټه واخلي، استنجا لره روان شي

تقوی تر هسې حده، په اولجه يې وړي که زر شته

د بل کره چې ورشي په خپل روی بنديان پرانزي

په ځان باندې چې راشي کله روی د پيغمبر شته

يو ځای الوده نه دی په داهسې دروېشانو

په دا دور که گورئ دا ناپاک په هر کشور شته

بادشاه قطب اقطاب دی، امراگان چې ورته گرځي

کږې څېړۍ تړلي د هر چا په سر ميزر شته

چې خاص د زمانې دي حال يې دا دی، نور وگړي

د غواوو دخرو کلي خالي نوم باندې بشر شته

چې حال د پرهېزگارو سراسر واړه دروغ شو

رښتيا غواړې له چا نه، چېرته پاتې دا هنر شته؟

نه مهر، محبت، نه مروت، نه وفا صدق

عالم سره برهم دی،څو دا دور د قمر شته

اشنا له هيچا مه شې، که پخوا اشنايي ښه وه

چې اوس له چا اشنا شې نور يې څو رنگه خطر شته

تر دې ژونديو ښه دي مړه پراته په گورستان کې

چې نه يې دا مکرونه، نه دا فعل ، نه دا شرشته

دروغ ويل هغه کا چې يې وېره وي يا طمعه

خوشال په دا اړ نه دی حق به وايي څو يې سر شته