په هر کار کې مصلحت شته

په هر کار کې مصلحت شته

خپل، پردي ته نصيحت شته

چې لر، بر له مصلحت شي

کله خير، برکت شته

د سړي هومره ښادي ده

چې په زړه کې يې همت شته

چې همت د سړي نه وي

مهيا ورته نکبت شته

سر هاله په تنه ښه دی

که دسر، سره عزت شته

د سړي چې عزت نه وي

د ژوندون يې څه حالت شته

په صحيح غني هغه دی

دهر چا چې قناعت شته

له نېستيه اندوه مه کړه

که په تن کې دې صحت شته

چې صحت د صورت نه وي

څه په کار که دې دولت شته

دين دنيا دې مبارک شه

که دانا سره صحبت شته

اوس ياري مه کړه خوشاله

د يارۍ سره آفت شته