په ظاهر صورت جامه ښکاره گدا يم

په ظاهر صورت جامه ښکاره گدا يم

يو تفسير په حقيقت کې د معنی يم

منزل ما د عشق افق ته د شپې وکړو

د وصال په سحر سترگه د سبا يم

بانوا عاشقان واړه راته هېڅ دي

خوشه چين زه د خرمن د بېنوا يم

مستور پروت يمه په ستر د جسد کې

زه يو برق بې پناه متجلی يم

د ناسوت په څلور گوټه کې بندي يم

زه مارغه د ملو کت د کبريا يم

وم د اصل سره اصل خو چې بېل شوم

اوس پخپله خوله د خپل ځان په ثنا يم

حقيقي مې دا بېلتون نه دی نسبت دی

زه د چا سره واصل وم چې جدا يم

د حيات شرابو نوې فنا راکړه

اوس پوه نه يم چې باقي يم که فنا يم

په هر رگ کې مې جوش د شهادت دی

دا په دا چې په حمزه زه مسمی يم