نظم
پلار يې درسته ورځ په ښکار وژني اسونه
خوشحال خان خټکپلار يې درسته ورځ په ښکار وژني اسونه
په پالکۍ کې ځي په رنگ د رنځورانو
که په شمار په حساب دېرشو ته نژدې دي
همه واړه دي په شمار دنامردانو
په يوه کې هومره کار برکت نشته
لکه کار د نام و ننگ دی د خانانو
دا دکاڼي کاک زما د عابد خان دی
د مغول پلاو د نورو فرزندانو
که دا هومره ناخلف واړه خلف وای
نن به ما نوبت واهه د خسرونو
کم کوتري د لويو سپيو هنر اخلي
پيروي، کا کشران دمشرانو
ده مړ يو د کونجو حساب غواړي
په کيله په جوکه ځير دی د هندوانو
په جهان کې چې محنت دی يا راحت دی
په وار وار واړه ورځي په ملوکانو
که خزان دی که بهار د هر چا نه دی
دواړه توکه دي دباغ د صاحبانو
د اسمان وگرځېدو ته ننداره ده
گوندې وي چې پېره بيا راوړي يارانو
فليل ،چوه رانجه نکريزې ورته پېري
مشاطې غوندې خدمت کا د زنانو
خوی د پلار د نيکه هيڅ ور څخه نشته
په خصلت دي همگي د پراچگانو
دمحنت د مشقت د تلاش نه دي
دراحت دفراغت دي د ريحانو
چې مې ښه په زړه کې فهم فکر وکړ
احمقان راته ښکاره شول په خويونو
يوهغه سړی احمق بللی بويه
چې باور کا د غليم په سوگندونو
بل هغه سړی احمق بللی بويه
چې پاړو شي د لړمو دمارونو
بل هغه سړی احمق بللی بويه
چې په سپينه ږيره خيال کاندي د جونو
بل هغه سړی احمق بللی بويه
چې د ښځو سره پاڅي په جنگونو
بل هغه سړی احمق بللی بويه
چې دخسر کره به اوسي په کالونو
بل هغه سړی احمق بللی بويه
چې ويښته به توروي په خضابونو
بل هغه سړی احمق بللی بويه
چې بزرگانو سره خير شي په جنگونو
بل هغه سړی احمق بللی بويه
چې يک لخت به اعتبار کا په تربرونو
بل هغه سړی احمق بللی بويه
چې په هر طبيب دارو کا د رنځونو
بل هغه سړی احمق بللی بويه
چې به بې تورې دعوه کا دملکونو
بل هغه سړی احمق بللی بويه
چې به جنگ وته پرې کړی ځي تر ملونو
بل هغه سړی احمق بللی بويه
چې لويي کا په لباس په کسوتونو
بل هغه سړی احمق بللی بويه
چې به دی غواړي لويي په نسبونو
بل هغه سړی احمق بللی بويه
چې د تېښتو گومان ورک کا د مريونو
بل هغه سړی احمق بللی بويه
چې به مال د دنيا نه خوري په کورونو
بل هغه سړی احمق بللی بويه
چې بدخواه سړی به پرېږدي په رويونو
بل هغه سړی احمق بللی بويه
چې بې ځايه ځغلول کا د اسونو
بل هغه سړی احمق بللی بويه
چې پيران به کښېنوي په خپلو خونو
بل هغه سړی احمق بللی بويه
چې بې حده تکلف کا په ځايونو
بل هغه سړی احمق بللی بويه
چې خبرې کا په سترگو په لاسونو
بل هغه سړی احمق بللی بويه
چې د غوښتو کر به کاندي په ډاگونو
بل هغه سړی احمق بللی بويه
چې به سود او سودا کاندي د بازونو
بل هغه سړی احمق بللی بويه
چې بربنډه کونه لامبي په سيندونو
بل هغه سړی احمق بللی بويه
چې غوږ نه کا دخوشال په دا حرفونو