ثواب د قرآن چې فرزند يې لولي

هر فرزند چې قرآن خوان وي

د مور پلار دې هم د ځان وي

په هر حرف به گونا گونې

نېکۍ بيامومي زر گونې

په هر حرف يې له دفتره

ځي بدۍ يې لس لس زره

چې لس زره وږي سېر کا

بربنډ پټ تر دا نه ډېر کا

په فرزند چې څه خرڅېږي

چې قرآن دده زده کېږي

په دنيا به مومي څومره

لکه غر د احد هومره

مزد ثواب به هومره مومي

لکه حج لره څوک درومي

يا جهاد کا يا غزا کا

لس لس زره يې بيا بيا کا

مزد ثواب د قرآن ډېر دی

تر حساب تر شماره تېر دی

په قيامت به ځي د وړاندي

چې په خلد يې داخل کاندي

چې کودک په دبستان شي

دی اول تسميه خوان شي

مور و پلار دې دا درې تنه

مسئله ده مبرهنه

هغه د رنگ آمرزيده شي

له استاده که دې زده شي

چې افضل د عبادت دی

شک و مه کړه تلاوت دی

ايستاده چې قرآن لولي

په نمانځه کې قرآن لولي

سل نېکۍ به يې وکښينه

په هر حرف چې يې لولينه

شل نېکۍ به د هغه وي

په قرآن چې غوږ دده وي

که يې لوستل په ناستې وينه

په نمانځه کې يې لولينه

د هغه به پنجاه بس وي

د نغتوني به يې لس وي

بې نمانځه چې تلاوت کا

په هر حرف چې روايت کا

لس نېکۍ به دده وينه

د سامع به يوه شينه

چې درست ختم سړی وکا

د هغه بخره به څه کا

په جنت کې يوه ونه

سايه داره لويه پلنه

څو چې دا واړه دنيا ده

ترې يې څانگه لويه لا ده

د هغې ونې تر سوېره

دی به کښېني زما روره

رنگا رنگ مېوې خوندونه

څو څو رنگه نعمتونه

هر طعام چې يې رضا وي

زر به ده ته مهيا وي

رنگا رنگ به وي فرشونه

لون لون پوششونه

نور پراخ ارت قصرونه

ښکلي ښکلي محلونه

رنگا رنگ ښکلي اسونه

مرصع واړه زينونه

خادمان ښايسته حورې

په خدمت به وي حضورې

د قرآن له رويه خدايه

مه کړه ما بې هسې ځايه

مور و پلار خېلخانه واړه

د جنت په خوښۍ وياړه