شلم فصل - په بيان د راېستلو د باز له کرېزه

چې خپل باز په وخت اخلې له کرېزه

له ما ياد لره پوره کړه دا څو څيزه

لس پينځلس ورځې ورکړه غوښې وللې

چې يې سست کا د درون د وازدو ولې

دستکشي د باز کوه چې ښه آرام شي

بيا يې صاف کړه چې يې لرې خلط تمام شي

له کرېزه يې راواخله ښه يې ساز کا

چې عمل يې اراسته شي ښکار په باز کا

که دې باز بې وخته واخيسته له کرېزه

چېيې وازده لرې ښه نه شي غزيزه

د کريز محنت دې واړه حبطه دی

د کرېز په اخيسته تلوارگنده دی

که هر څو د وخته باز کا بڼه تويه

اخيسته يې د ميزان په آخر بويه

چې هوا دغار مو نه وي ساړه راشي

د کرېز په باز هاله مسهل روا شي

په مقدار کرکڼې زړی مالگه بويه

په حساب نبات د مالگې سره زويه

اووه بخرې د نبات وي يوه مالگه

تر دا زيات او کم دې نه وي ذره مالگه

د انار په اوبو سازې کړه گوليې

ورکوه يې صبح دم که خبر ته يې

د کرېز د باز مسهل په احتياط کړه

چرې نه چې باز ضايع شي ځان بقراط کړه

که بيمار وي نو مسهل ورته ښه نه وي

تر هر څه د شودو پيو مسهل ښه وي

که يې وازده وي په تهه کې پرش نه کا

پليته ورلره بويه چې ښکار ښه کا

څورب باز چې له کرېزه نه اخيست شي

که آرام نه وي پړکېږي پر يې سست شي

چې د باز وازده پاره په پړ کېدل شي

په اصلاح به يې را نه وړې نور که سل شي

د کرېز دي که د کور دي که د تور دي

کار د هرې چار مرغۍ دا دی نه نوردي

څورب باز پړکېدلو څلور ځايه

رنځ زحمت مومي که غوږ باسې نېک رابه

يا په تهه يا په لړمون يا په مغزو کې

رگ و پی يې سست شي وشلېږي په پرو کې

په شلېدلي باز که فصل تلينه تېر شي

بيا يې هال گوندې رنگ د باز په څېر شي

په کرېز واړه مرغونه سره سم دي

باز باښه شاهين ،شنقار که لوی که کم دي

سنگرېزه دې نژدې اچوي شاهين ته

چې يې وخوري خېری نه پرېږدي لا چين ته

د شنقار کرېز د يخ د پاسه شينه

په کرېز کې پاس په يخ باندې کښېښنه

جاله هم د يخ دپاسه د شنقار وي

تل دده له يخ له برفه سريکار وي

په کرېز کې منع شوې آبداره ده

که د خلط زحمت لرې چار يې ښکاره ده

تر پينځه تر شپږ کرېزه پورې جوړ وي

چې تر دا دپاسه کېږي نور باز زوړ وي

په هيليو که باز زوړ شي هم الوځي

قابوچي شي د دراج د ښکاره ووځي

د جره خوبي تر درې يا تر څلور وي

چې تر دې نه زيات کريز خوري کار يې نور وي

باښه څو کرېزه کېږي لا ښه کېږي

کال په کال باښه ځوانېږي نه زړېږي

شاهين لاتر بازه ډېر خوري کرېزونه

خوب گيري خوبي دده شي لا افزونه

باز هغه، شاهين هغه چې کرېزي شي

په چوزي کې دده ښکار بې تميزي شي