شاعران يو په نغمو يادوو خدای

ښکلي ګورو ، په لېمو يادوو خدای

خدای بلد کړو د توبو په ماتولو

غړپ کوو له پېمانو يادوو خدای

شېخ د کاڼو په تسپو يادوي خدای

موږ د اوښکو په تسپو يادوو خدای

د ژوندون په ګوتو برګی تسپې وايو

هم په ورځو هم په شپو يادوو خدای

يم هيرجن چې هير مې نه شي راته خانده

ستا له شونډو اننګو يادوو خدای

ايا تونه دې په سترګو کې موسکي دي

ستا له سترګو پښتنو يادوو خدای

موږ کاروان د لېونو ازادي غواړو

په کړۍ د زولنو يادوو خدای