شفاعت د محمد ثابت په نص دی

شفاعت د محمد ثابت په نص دی

دا په دا چې دی د درست جهان اخص دی

د موسی، د عيسی کله دا صفت و

د لولاک نعت په ده باندې مختص دی

اوليا يې د امت واړه ممتاز دي

هر ولي يې په ارشاد کې مرخص دی

سر حلقه د اولياو هغه شماره

چې شيطان يې بندي کړی په قفص دی

د رستم د مېړنتوب خبرې هيڅ شوې

ذوالفقار چې يې ياد شوی په قصص دی

دوستداران له اهل بيت د اوره خلاص دي

بې درستۍ يې د عالم کله مخلص دی

په ولا که د علی رافضي کېږي

سکه خوشال يې په ولا کې مشخص دی