څوک به څه ساتي په پوهه، په پندونه

څوک به څه ساتي په پوهه، په پندونه

په ويښته سره تړلي پيوندونه

په يوه قفس کې بند کارغه توتا کړه

سره بېل به وي د هر يوه سندونه

يا کشتي د زورور سره مه کړه

يا د دوی غوندې پيدا کړه مړوندونه

موږ په دا عقل روغ نه يو، لېوني يو

معشوقه چې و عاشق وته غندونه

عاشقان د شاه دخولې يو، زر مو نشته

که په سر يې ليدل مومو سر ښندونه

چې باور دې په رښتيا خبره نه کا

و هغوی وته به څه خورې سوگندونه

چې ناپوه سره تېرېږې ډېر افسوس دی

د دانا سړي کېميا غوندې ژوندونه!

په خپل ښکار پسې به څه رنگ باز الوځي

چې باز دار يې پسې وا نه کا بندونه

د شکرو خوند به هيڅ ورباندې نه وي

چې خبر وي دخبرو په خوندونه

تا د زلفو په زنځير کې خوشال بند کړ

افرين دې په دا هسې شان بندونه