سپرلی شو د گلرخو تماشا ته مې زړه کېږي

سپرلی شو د گلرخو تماشا ته مې زړه کېږي

هر څو که مړغېژن يم خو خندا ته مې زړه کېږي

توبه په پسرلي کې له رنگينه لېونتوبه

باغ پرېږدمه د بوی غوندې صحرا ته مې زړه کېږي

شبنم وې د فطرت په کار ژړا ته مې زړه کېږي

رېدې پياله په لاس کړه چې صهبا ته مې زړه کېږي

دا رنگ په رنگ گلونه چې حال نه وايي بس خاندي

زړه چاودو هله راشئ چې افشا ته مې زړه کېږي

سنبل کړه تنسته د يار د زلفو د خيال جوړه

په هوش يم خبروم دې چې سودا ته مې زړه کېږي

ورانېږي مې هستي په ودانۍ کې بړبوکۍ يم

وحشته پېچ و تاب مې کړه صحرا ته مې زړه کېږي

اغزي هم څنگ تر څنگه شو د گل سره ملگري

خالقه د سپرلي ښکلي اشنا ته مې زړه کېږي

راغلی چې فرياد يې د جرس و په ځواب کې

نن بيا هغسې چيغې نا رسا ته مې زړه کېږي

حمزه د عشق په گل کې مې هستي لکه نگهت شوه

روان يم نه پوهېږم چې کوم خوا ته مې زړه کېږي