ستا په حکم کې تاخير کولی نه شم

ستا په حکم کې تاخير کولی نه شم

د تقدير سره تدبير کولی نه شم

ستا نېټو د وصال خوب په خوب کې خوب کړ

څو چې ويښ نه يم تعبير کولی نه شم

بس چې ستا مينې مې لاس د ناموس تور کړ

اوس په غم د ناموس وير کولی نه شم

ستا په مخ کې مې مجال د تقرير څه دی

چې خلاف دې د تصوير کولی نه شم

په وروستۍ سلگۍ کې راشه د يار نومه

بيا خو چرې دا تقصير کولی نه شم

خدايه دا يې توجه ده که غفلت دی

منتظر يم او شبگير کولی نه شم

گله ستا ښکلې ورشو دې وي سر سبزه

که سيلونه د کشمير کولی نه شم

چې د سرو اوښکو جرگه راسره نشته

ننواتې د تاثير کولی نه شم

ما پېښې د لېونو کړې چې په خود شوم

نور توهين دې د زنځير کولی نه شم

حمزه! اوس مې د حسرت د وينې وار شو

بس د اوښکو نور بهير کولی نه شم