طلب د يار زړگيه پاڅه په پالنگ نه شي

طلب د يار زړگيه پاڅه په پالنگ نه شي

هغه صادق نه دی چې يار پسې ملنگ نه شي

ځکه حيران يم چې لاسونو د صنم له حنا

دزرو زړونو که وي خون، نو به په رنگ نه شي

منزل چې شپه کړه اختيار په سپينه ورځ مه کړه يون

واصل به شمعې سره بې له شپې پتنگ نه شي

درېغه ډيوه د سپين بشر که راعطا کړي صنم

چې بې قرار زړه مې په تور لحد کې تنگ نه شي

ما وازه خوله لکه برزخ په انتظار نيولې

حيف چې دلبر مې پس له مرگه هم تر څنگ نه شي

چې په کوڅه د فخر علم کې لتاړ نه شې

ستا به حمزه جامې د عشق په خم کې رنگ نه شي