تياره تصوير

ته چي په نيمه شپه كي غلې غلې

زما د خيالونو تر جنته راځې

او زمولوې تازه تازه ګلونه

د پښو آواز دي نه وي

خو له تصويره دي تيارې را اوري

زما د زړګي دپاره خپله سينه

تنګه سي، توره سي، اغزي اغزي سي

په رېږدېدلو لاسو

موږم بې واكه، ترهېدلي، خوبولي سترګي

ستونى مي ډك سي

وايمه چيغي كړم ګرېوان وشلوم

په خيال كي وينمه تصوير د جانان

چي له سرو شونډو يې څك څك راځي كوټلي ويني

زه لېونى خو نه يم

كه نه دا څوك يې چي دي نه پېژنم

او ته مي هره شېبه

د تنهايي رنګين رنګين خيالونه

د مرګ او وير په چيغو وتوروې