تورې ببلا لري تورې عينينې

تورې ببلا لري تورې عينينې

تور اژدرها لرې تورې زلفينې

د ما په زړه وه چې خوب به څوکا

چې دا بلا دی ورباندې تينې

چې دواړه سترگې په رنجو تورې کړې

سره نمري واغوندې، زلفې نسکورې کړې

هم سرې لمبې شي هم تور لوگی شي

بابا دې ومره، يو اور راپورې کړې

چې مبتلا شې په مه جبينې

هومره خوارېږې پخپلې مينې

قيس مجنون نه و، ليلی مجنون کړ

په کوهکن وکړې شندې شېرينې

سيالي له مرده مه کړه ته، ښځې

يو کار دتورې دی، بل دتښځې

اس به غله خوري ته به بيا غول خورې

خره د اس نه که په دو ته ښه ځي

صوفي کافر دی پخپل پندار کې

ملا ملحد دی د حق په کار کې

ځار تر رندانو چې مخ څټ يو لري

يک رنگ ولاړ دی په هره چار کې

گوره چې کېږي په خوشال شندې

اوبه په څنگ کې مرگ يې له تندې