اوښکې هم به مې گونگۍ شي، نن مې داسې يقين راغی

اوښکې هم به مې گونگۍ شي، نن مې داسې يقين راغی

پوره لوظ کړ هغه ښکلي، ولې غوټه جبين راغی

يو ناڅاپه شه دې ور کړ، تا زما د زړه بادشاه ته

ستا په زد کې عشقه کله، چې دعقل فرزين راغی

لا تېزي به دپخوا نه، ستا په تگ کې را پيدا کړي

لارويه زړه په ځای کړه، څۀ گرداب که قرين راغی

حکومت د سليمان به، هم هغه ته وي بې آبه

د تا نوم يې چې ای ښکليه، د زړگي په نگين راغی

سپين سپېڅلی ساده زړه مې چې تا وغوښتو ما در کړ

په سپين تور دې خبر نه شو، که سپين تللی و شين راغی

لږ خو ځير شه چې خوشحال شې ستا لويې خو هم په دې ده

ای د حسن شهرياره، که ستا در ته کمين راغی

چې ليسوب د مؤمنانو ، شو قبله زما د فکر

حمزه ځکه ماته اوس د معارفو گبين راغی