هغه يار چې له ما لرې په هېواد دی

هغه يار چې له ما لرې په هېواد دی

همېشه راته حاضر د زړه په ياد دی

د وصال خوښي يې هم لا هومره نه ده

چې مې زړه دده له خياله سره ښاد دی

بېهوده له ياره زار کوم و چاته

د خپل يار له جوره چا موندلی داد دی

په ما واړه چارې وکړې اشنايي

په ناحق مې له بېلتونه نه فرياد دی

چې مې هيڅ اثر د آه ورباندې نه شي

دا ناترس خاطر يې کاڼی، که پولاد دی

دختا هوسۍ په بوی دنافې ښکار شي

راته بس د هغو زلفو بوی مراد دی

ته چې ما وته ارشاد کوې په عشق کې

کله غوږ د عاشقانو په ارشاد دی

چې په هيڅ توکي زما له زړه نه نه ځي

دخپل يار دمينې څه محکم بنياد دی

يوزمان ورځنې خلاص نه يم په عمر

په ما خوار باندې دعشق جور معتاد دی

څه عجب ښه بوی راځي د يار له لوريه

نن زما دزړه دمه د سبا باد دی

تل گرېوان په اوښکو لوند، ساړه آهونه

چې خوشال مين کېده دا يې هداد دی