وی مې خلاص به شم په څه له بده ياره

وی مې خلاص به شم په څه له بده ياره

وی يې تل ځنې غوښتنه کړه د مال

وی مې ډار او ترس له کومه شخصه بويه

وی يې هر چې ورته يو حرام حلال

وی مې کوم څيزونه گران په مرد تر ځان دي

وی يې دين او بل دانش دی د رجال

وی مې څه دي چې دانش پرې ضايط کېږي

وی يې لافې د دروغو قيل وقال

وی مې لافې هوډ په څه تر سره کېږي

وی يې زر بويه ځوانان بويه قتال

وی می څه دي چې نښان دځوانمردۍ دي

وی يې عفوه په هنگام داستقلال

وی مې څه رنگه به والوځم اسمان ته

وی يې داسې د همت په پر و بال

وی مې کومه چار بهتره تر هر څه ده

وی يې هر چې نېک عمل کړي نېک افعال

وی مې څه کړم چې محتاج د طبيب نه شم

وی يې لږ خوره لږ دخول کړه لږ مقال

وی مې څه کړم چې هر څوک په ما مين شي

وی يې مه وايه دروغ مه کړه جنجال

وی مې چا سره تدبير کوم په کار کې

وی يې هر چې ابلهان دي غير سيال

وی مې کوم سړی دښمن بللی بويه

وی يې هر چې په ښادۍ دې شي ملال

وی مې چا سره خوښي دوستي دکړو ده

وی يې هرچې تر تاکوز لري احوال

وی مې کوم سړی مؤمن بللی بويه

وی يې هر چې راضي نه وي په وبال

وی مې کومه چار جنت ده په دنيا کې

وی يې ښځه چې هم يې خوی وي هم جمال

وی مې څه دي د خوشال خټک خبرې

وی يې واړه دُر گوهر دي عقيق لال