يا په زړه کې مهر ځای وای د بتانو

يا په زړه کې مهر ځای وای د بتانو

يا يې ورکړای صبوري و عاشقانو

يا حيران عاشق په مرگ ومړای چې خلاص شوای

يا يې هومره جور مه وای د چشمانو

چې ظاهر، باطن يې دواړه سره جوړ وي

څه عجب خاصه مشرب دی د رندانو

چې په يار پسې روغ ځان سېځي په اورکې

زه په دا رسم مين يم د هندوانو

د خپل يار په بدو خاندم، هوسېږم

چېرې زړه نه شي راښه د رقيبانو

چې مې نوم په ژبه واخلي هسې خوښ يم

لکه ږغ دخلاصي وشي په بنديانو

بيا په صبر د خوشال خټک اولجه کا

راڅرگنده شوه سره کړې خوله په پانو