يوويشتم فصل - په بيان د بتوله کولو د باز او د باښې

لکه کار د تير انداز د برتولې دی

هسې رنگه کار د باز د بتولې دی

باز دا هسې بتوله وخوري له دسته

لکه غشی سم ثابت ووځي له شسته

لس پينځلس گزه لاړ شي پرونه واکا

په قوت د بتولې پرونه پيدا کا

څوک چې مشق د بتولې صفا همزار کا

د باښې پرونه تړلي وي پرې ښکار کا

نهايت د مير ښکار يې هنر دا دی

که مير کښار په بتوله کې په خطا دی

بتوله دې د مرغه نه وي په بيړه

په قابو به بتوله يې کړه ته ويړه

د باښې په بتوله کې لا ډېر کار دی

چې باښه يې ښه دست روکړه مير شکار دی

مشتکي دې يا شيکره يا بېسره وي

چې باښه يې مشتکيکړه مسخره وي

د مير ښکار ساز کړی باز هم دمير ښکار وي

د ښه باز د بد سړي سره څه کار وي

چې ښه باز د بد سړي تر لاسه ورشي

که يولاس يې بتوله کا هم ابتر شي