يوولسم باب په بيان د اعلی همتۍ کې

د هر چا چې همت لوی دی

هومره گنج ورباندې توی دی

چې همت دسړي څومره

د هغه وي قدر هومره

څو همت دچا بلند وي

هغه هونبره ارجمند وي

د همت پرونه پيدا کړه

په اوه اسمان پر وا کړه

هر سړی چې همتناک وي

ځای يې پاسه په افلاک وي

چې همت هومره رفعت وي

چې همت هومره دولت وي

همت شخص دولت يې ظل دی

پرې به پوه وي چې عاقل دی

چې همت د چا رهبر شي

واړه کار يې ميسر شي

په همت سره پايدار وي

اعتبار وي، که مقدار وي