ذکر د فرض د واجب د سنت د ادبونو

هر سړی چې ايماندار وي

په اخلاص به نمونځ گذار وي

پس له شناخته له توحيده

د نمانځه دي ډېر تاکيده

فرض واجب زده کړه دا دواړه

و سنت ته کېږده غاړه

موافق په شرع کار کړه

په ادب کې زيست روزگار کړه

په ولاړ په ناست په تله کې

ادب بويه په هر څه کې

د سړي چې ادب نه وي

تر سړي نه څاروي ښه وي

چې حاجت دې د خلا شي

لرې ځای ته دې تله ستا شي

پټ له خلقه لرې کښېنه

ورکړه زور وکيڼې پښې نه

و قبلې وته مخ مه کړه

په قمر په نمر هم زده کړه

ځان جامه ساته له بوله

غايطه ورو کوه له هوله

په صحرا مه کړه خبرې

کنه غول خورې چې نغړې

يا چې ونې وي باردارې

يا سايه لري د لارې

يا دېوال چې سايه دار وي

يا د رود غاړه يا لار وي

دا څو ځايه غايط مه کړه

که سړی يې ادب زده کړه

په غايط په بول ځوانه

حذر کړه له گورستانه

بول مه کړه په سوراخ کې

يا په ورخ کې يا په کاخ کې

هورته خونې د پېريان وي

خپل مکان په هر چا گران وي

چې فارغ شې له صحرا نه

ته دې نه وې بې دعا نه

که پوهېږې خدای به ستايې

ته به دا دعا ووايې (اَلحَمدُالله الذي اَخرَج عَني مَا يُوذِيني)

ځان به پاک کړې په درې لوټې

يا درې کاڼي شو کا غوټې

که درې کاڼي نه وي يو بس

خود پوهېږي په خپل ځان کس

خو پاکي د وجود بويه

لوټه کمه وي که لويه

وچې پاڼې وچ واښه هم

استنجا لره دي ښه هم

پشم جيره خاورې پاکې

استنجا لره دي ښه هم

بيا چې واخلې يو څو گامه

استبرا وکړه تمامه

چې وسواس لرې په زړه کې

هيڅ تعطيل مه کړه په وله کې

په ښي لاس اوبه اخله

په کيڼ وينځه پټې خپله

په وله کار مه کړه د سستو

ځان ښه پاک کړه وړاندې روستو

که ککړ تر درم کم يې

اوبه مه اخله بې غم يې

چارچوبۍ لره که درومې

دا ادب بويه چې مومې

اول کيڼه پښه درون کړه

په واته کې ښی بېرون کړه

دا دعا د هغه دم ده

د دانا ده د اعلم ده (اَللهُم اٌِني اَعُوذُ بِک مِنَ الرجسِ النجَسِ الخبِيثِ المُخبث الشيطان الرجيم)

اصل کار د دين پاکي ده

په پاکۍ کې بې باکي ده

له درې توکه پاک صورت کړه

هاله مخ په عبادت کړه

له اوله معصيت دی

بل حدث بل نجاست دی

د گناه پاکي توبه ده

تل پاکي د توبه ښه ده

د حدث پاکي ابدست دی

دهوښيار دی که د مست دی

نجاست په غسل درومي

ځان جامه پرې پاکي مومي

پاکي درې اوبه هم درې دي

د باران که د چينې دي

بيا د سترگو اوبه جانه

چې پرې پاک شې له عصيانه

چې دا درې پاکي لرينه

غم دې هيڅ نه کا که مرينه

په صحيح چې دوست د خدای دی

د پاکانو جنت ځای دی

په قرآن کې د آيت دی

راشه واوره چې آيت دی (اِن اللهَ يُحِب التوًابِينَ ويحِب المتطهرِينَ)