زما برخه

چيغه پورته سوه چي خداى مو مهربان دئ

لوى سخي يې د سخيانو را روان دئ

اراده يې دا ځل کړې ده ښه کلکه

چي و هر چا ته لمن کاندي ور ډکه

هيڅ وګړى به بې برخي پاته نه سي

د مودو مودو ډېر وږي به ماړه سي

سُستي مه کوئ بيدار کړئ خپل ځانونه

ښه راغلي ته يې تيار کړئ خپل ځانونه

په بڼو ور ته جارو کړئ لويه لاره

مېدان ودروئ روڼ لکه هينداره

را دننه چي سي دى دغه مېدان ته

دا سپوږمۍ چي سي را ګډه دې آسمان ته

په قطار کي شاوخوا باندي را ټول سئ

دى به وي لکه سپوږمۍ تاسي يې شپول سئ

په ځولۍ کي به يې لويه خزانه وي

په ښي لاس کي به يې ښکلې پېمانه وي

ورکوي به په هغې يو څه هر چا ته

هيڅ وګړى به بې برخي نه سي پاته

د دې واري اراده لري ښه کلکه

چي و هر چا ته لمن کاندي ور ډکه

په کار دا ده چي جارو سي ورته لاره

مېدان ودرېږي روڼ لکه هينداره

وه دا چيغه اورېدلې هر وګړي

خپل کارونه يې وو ټول و شا ته کړي

له ملنګه بيا د کلي تر بخيله

وو راغلي خلک ټول په لويه هيله

خو ولاړ پر خپل خپل ځاى وو داسي واړه

لکه نن چي وي کار ټول زما په غاړه

چا ويل راته چي دې کار ته ولاړ سه

چا ويل په هغه بل کار پسې ولاړ سه

چا ويل کړه دا اغزى له مخه ليري

چا ويل کړه هغه شى له مخه ليري

او ما هم په دا هر څه کي ليده ګټه

له هيڅ کاره به مي نه کوله نټه

سره اغزي مي بدلول غوښتل په ګلو

ومه دا رنګه لګيا په هلو ځلو

لکه نن چي دا سخي راځي تش ما ته

له ما پرته نظر نه کوي بل چا ته

موږ لګيا سوو چي صفا کړو ورته لاره

مېدان ودروو روڼ لکه هينداره

سوم په دغه کار کي زه تر ټولو ستړى

د ستړيا په دغه حال کي وم خوب وړى

چي هغه راته نو زه داسي بيده وم

چي په دې خبره هيڅ هم خبر نه وم

چي هر چا ده ترې اخستې خپله برخه

چي را ويښ سوم اوبه تېري وې له ورخه

لوى سخي و د سخيانو بېرته تللى

پاتېداى په داسي حال کي سي څوک غلى

ما په چيغو چيغو وويل چي کله

هغه راغى ، تاسي ويښ نه کړم زه څله ؟

خپله برخه ده هر چا ترې لاس ته کړې

خو زما برخه مو ده په سېلاب وړې

چي د کار وخت و هر چا ته ومه ياد زه

نو د وېش پر وخت مو ولي کړم برباد زه

دوى ويل ته هم دغسي نه يې پاته

خوږه برخه د خوب ورسېده تا ته