زما مينه ياره! چې نن ناست زما په کټ يې

زما مينه ياره! چې نن ناست زما په کټ يې

موندلی مې په بخت يې، که موندلی مې په مټ يې

آرام شته، د زړه کام شته د چمن لاله غوړېږي

په دور د شرابو ساقي! ولې هسې لټ يې

نه دين لرم، نه دل لرم، نه صبر شته، نه عقل

په دواړو سترگو، وروځو تالا کړونی د درست هټ يې

چې مخ وته دې گورم، لکه نمر هسې ځلېږي

قربان دې تر جمال شم په معنی تر نمره غټ يې

چې ته را څخه نه وې، يو کنگال د زمانې وم

پادشاه د درست جهان يم چې له ما سره لټ پټ يې

پېرې به په گلزار کړې که بلبله د گلزار يې

گندکۍ لره به درومي که په اصل تور گونگټ يې

دوه ، درې حجابه څه دي، چې يې ته په مخکې نيسې!

په زر پردو کې کښېنه! بيا و ماته په چپټ يې

په خوب، په بيدارۍ کې همېشه په فکر ستا دی

اورنگ وته خيبر دی، و خوشال وته کوهټ يې