عجب کار دی ستا د شونډو

عجب کار دی ستا د شونډو

ښه روزگار دی ستا د شونډو

پرې بنډو دی د ځوانانو

څه دربار دی ستا د شونډو

په کالونو له ما نه ځي

بد خمار دی ستا د شونډو

لکه ستا زلفينې، زړه مې

په کنار دی ستا د شونډو

د يمن ياقوت آبدار دي

که آبدار دي ستا د شونډو

په صورت کې مې جان څه دی؟

يو يادگار دی ستا د شونډو

په هجران کې سرې سرې اوښکې

دا نثار دی ستا د شونډو

ځکه ځان هسې عزيز دی

پرې گوزار دی ستا د شونډو

چې دخضر ترې مايه ده

چشمه سار دی ستا د شونډو

ځان بې ستا له شونډو پايي

شرمسار دی ستا شونډو

دخوشال خټک په زړه کې

انتظار دی ستا د شونډو