عاشقان چې د معشوقې دلداده دي

عاشقان چې د معشوقې دلداده دي

له همه واړه غمونو آزاده دي

په يوه لحظه کې هست، په بله نېست شي

که يې گورې عاشقان په زړه ساده دي

مگر زه له ځايه غم لره پيدا يم

په هردم راته غمونه آماده دي

له يوه زه د نظام پور په کوټ کې پروت يم

سوختگان يې په هر لوري افتاده دي

په درون د عاشقانو نظر وکړه

دلاله غوندې د داغ سره زاده دي

ترک، تاجيک، عرب ، عجم عاشقان واړه

مست، بېخود د ديو دخمرو په باده دي

د هوا خدايان دې لرې کا له دله

يوه خدای وته چې ناست په سجاده دي

چې تر خپلې رضا تېر شي اولياء شي

اولياء له هره غمه آزاده دي

غوبانه، شپانه ظاهر سړي ليدل شي

په معنی کې دپاده سره پاده دي

شېخه! ته چې ډېر طاعت کړې، جنت غواړې

و جنت وته ورتله په اراده دي؟

عاشقان که معشوقه په تېغ ورژني

ورمېږونه يې و تېغ ته نهاده دي

چې د ننگ په چارو نر نه دي خوشاله!

که يې نر وينې په سترگو هم ماده دي